करणी माता के 52 दोहे डाढ़ाली माँ डोकरी दुहा बावनी

करणी माता के 52 दोहे डाढ़ाली माँ डोकरी दुहा बावनी

🙏🌷डाढ़ाली माँ डोकरी🌷🙏

---------------------------------------------------

🌷🌷दुहा बावनी🌷🌷

---------------------------------------------------

      @अजयसिंह राठौड़ सिकरोड़ी

*********************************

डाढ़ाली माँ डोकरी, सेवग रीजै साय।

प्रथम वन्दन आपनै, गणपत रा गुणगाय।।1।।

डाढाली माँ डोकरी,मेहाई महमाय।

मढ़ में बैठी मावड़ी, मन्द मन्द मुस्काय।।2।।

डाढाली माँ डोकरी, मोटी करनल माय।

सारै कारज सेवगां, सगती करनै साय।।3।।

डाढ़ाली माँ डोकरी,आई करनल आप।

मेहाई तूं मावड़ी,देसाणा धणियाप।।4।।

डाढ़ाली माँ डोकरी,पावन धरां सुवाप।

आय अवतरया अम्बिका, आई आवड़ आप।।5।।

डाढ़ाली माँ डोकरी,देवल कुख दातार।

कीनिया कुळ में करनला, आप लियो अवतार।।6।।

डाढ़ाली माँ डोकरी, सातूं बहणा साथ।

भव तारण नै भगवती, आवड़ आईनाथ।।7।।

डाढाली माँ डोकरी,सातम शुक्रवार।

आप अवतरया अम्बिका, करणीजी किरतार।।8।।

डाढाली माँ डोकरी, आसोजां में आय।

चवदह सौ चौमालवै,मेहा घर महमाय।।9।।

डाढ़ाली माँ डोकरी, दिन्या दरस दिखाय।

निज माता नै करनला, सगती रूप दरसाय।।10।।

डाढ़ाली माँ डोकरी, रिधु नाम रखाय।

कस्ट भुवा रो काटनै,करणी जी कहलाय।।11।।

डाढ़ाली माँ डोकरी, परचा धापो धाप।

विष उतारनै बिसहथी,प्राण बचाया बाप।।12।।

डाढ़ाली माँ डोकरी,परण्या जिण संग आप।

साठीका में सारदा,देपा घर धणियाप।।13।।

डाढ़ाली माँ डोकरी,अणदो दियौ उबार।

बीच कूवै में डूबता,कानां पड़त पुकार।।14।।

डाढ़ाली माँ डोकरी,दुम्भी रूप धरन्त।

पल में जोड़ परमेसरी, टूटी लाव तुरन्त।।15।।

डाढ़ाली माँ डोकरी,कितरो करुं बखान।

परचा अलेखु आपरा,जग में जाणू जान।।16।।

डाढ़ाली माँ डोकरी, गायां घणी गुवाल।

गायां खातर गौरजा,रही आप रखवाल।।17।।

डाढ़ाली माँ डोकरी,करणी करनै कोप।

कालू सुरजो मारके,पल में मेट्यो खोप।।18।।

डाढ़ाली माँ डोकरी, दसरथ थान दिपाय।

अमर नाम रखावियो,मढ़ देसाण माय।।19।।

डाढ़ाली माँ डोकरी,तुठी रिड़मल राव।

कान्ह श्राप दे करनला, जांगल धरां जचाय।।20।।

डाढ़ाली माँ डोकरी,राठौड़ो री राय।

किरपा करनै करनला, सदा करी थै साय।।21।।

डाढ़ाली माँ डोकरी,जोधानै खुद जाय।

आप थरपियो अम्बिका,सुख सम्पत बगसाय।।22।।

डाढ़ाली माँ डोकरी, राज नुवों थरपाण।

कांधल बीको करनला,आप सरणली आण।।23।।

डाढ़ाली माँ डोकरी, सेखो करनै साय।

संवली रूप धर सारदा, आई बेगी लाय।।24।।

डाढ़ाली माँ डोकरी,धिन देसाणा राय।

बीका संग में भगवती, रंग कुंवरी परणाय।।25।।

डाढ़ाली माँ डोकरी, किरपा दयी कराय।

कांधल री करवाल सूं,राज भतिज थरपाय।।26।।

डाढ़ाली माँ डोकरी, हरदम आप सहाय।

भजियां भगती भावसूं,पल में पार लगाय।।27।।

डाढ़ाली माँ डोकरी, जेतल भूप जिताय।

कमधज री सुण करनला, कमरू मार भगाय।।28।।

डाढ़ाली माँ डोकरी,दीन्यो दरस दिखाय।

गंग भूप री भगवती, सदा रही तूं सहाय।।29।।

डाढ़ाली माँ डोकरी,सगती सुणजै खास।

अजय करै आराधना,माजी बारह मास।।30।।

डाढाली माँ डोकरी,करतां करुण पुकार।

दौड़ी आवै मावडी,करणी जी करतार।।31।।

डाढाली माँ डोकरी,मढ़ रै बैठी मांय।

देसाणा री मावडी,सब री करती साय।।32।।

डाढाली माँ डोकरी,सगळा मेट संताप।

सिवरुं हरदम सारदा,देसाणा धणियाप।।33।।

डाढाली माँ डोकरी,सब री लेवै सार।

सुणतां हेळो सामलै,पल में बेड़ो पार।।34।।

डाढाली माँ डोकरी,धरूँ मै थारौ ध्यान।

आई सिंवरुं आपनै, सगती रखजै शान।।35।।

डाढाली माँ डोकरी,सगती करजै साय।

अजय करै आराधना,चरणां सीस नवाय।।36।।

डाढाली माँ डोकरी,मढ़ देसाणा मांय।

मूरत थारी मोवणी,भगतां रै मन भाय।।37।।

डाढाली माँ डोकरी,आई बेगा आय।

चरण करुं लो चाकरी,देवौ दरस दिखाय।।38।।

डाढाली माँ डोकरी,थिर धर इधका थान।

आय विराजी अंबिका, सिकरोडी सुभान।।39।।

डाढाली माँ डोकरी,देसाणा धणियाप।

आई आवड़ आविया,सगती धरा सुवाप।40।।

डाढाली माँ डोकरी,इन्द्र सायर आप।

आवड़ करनल ईसरी,देसाणा धणियाप।।41।।

डाढाली माँ डोकरी,थिर धर इधका थान।

गांव गुवाड गढ़ा मढ़ा,आई थारी आण।।42।।

डाढ़ाली माँ डोकरी,मोरी करनल माय।

सुध बुध देवौ शंकरी,सारद मात सुरराय।।43।।

डाढाली माँ डोकरी,मेहाई महमाय।

संकट मेटण सारदा,आई बेगा आय।।44।।

डाढाली माँ डोकरी,रखजै सिर पर हाथ।

अटल भरोसो आपरो, आवड़ आई नाथ।।45।।

डाढाली माँ डोकरी,मोटी तुं महमाय।

भगतां रै घर भगवती, रास रमण नै आय।।46।।

डाढाली माँ डोकरी,देसाणा री राय।

उर नै करजै ऊजळो,मन मन्दिर महकाय।।47।।

डाढाली माँ डोकरी,मोटा करनल माय।

बेग पधारो बिसहथी, मेहाई महमाय।।48।।

डाढाली माँ डोकरी,सुणजै हे सुरराय।

सेवग करणै सायता,आई बेगी आय।।49।।

डाढाली माँ डोकरी,करनल सुणजै खास।

चरणां रखजै चाकरी,अजय करै अरदास।।50।।

डाढ़ाली माँ डोकरी, सुण ल्यो मेरी साद।

आई सिंवरु आपनै, पूर्ण करो फरियाद।।51।

डाढाली माँ डोकरी, आयी क्यूँ नी आज।

अजय बुलावै आपनै, मेहाई महाराज।।52।।

🙏🏻🌹@अजय राठौड़ 🌹🙏🏻

*********************************