श्री राम सुयश दोहावली भाग- 2 shree RAM DOHA PART 2

                    दोहावली भाग- 2 

         श्री राम सुयश दोहावली भाग- 2 

हरि तव किरपा होवतां , पंगू चढ़े पहार ।।

श्रवणे बहरां सांभळे , अंधहु दिसै अपार ।।16।।

गिरा ईश गुण गावतां , उर म्हें वधे उमंग ।।

कौशल सुत दसरथ कुंवर , राम सीतपत रंग ।।17।।

रामायण वाल्मिक रच , मानस तुलसी मान ।।दोहां में लिख दाखणो , राम तणो गुणगान ।।18।।

भारत के भू भाग में , अहड़ो शहर अनूप ।।

भांण वंश के भूपती , रघुवंशी कुळ रूप ।।19।।

अवध नगर शोभा असी , भलविध यों मन भाय ।।

देखण रे कज देवता , इन्द्र पुरी सुं आय ।।20।।

रंग जहां के राजवी , नीतिवत गुण निधान ।।रेण दिवस हिळमिळ रहे , सबेही एक समान ।।21।।

मन ऊजळ दशरथ महा , रघुकुळ अनमी रूप ।।

परम नीतिवत पाटपत , भलपण वंको भूप ।।22।।

राजा रे त्रय रांणियां कौसला प्रिय कहाय ।।

सुमित्रा कैकय सारखी , भूपत रे मन भाय ।।23।।

भूपत मन संशो भयो , इण कज हुओ उदास ।।

कुळ दीपक रे कारणें , आप गयो कर आस।।24।।

दशरथ मन री दाखवी , रिषी कने इम रांण ।।

पूत रतन को पांमवा , जिका दिजे वर जांण ।।25।।

भूप अरज इम भाखतां , दियो रिषी फल देख ।।

जा घर वांट जिमाविये , लाभ हुवे सत लेख ।।26।।

हरखे दशरथ हाथ सूं , आय दियो फळ ऐम ।।

हिय राजी हुय हेत सूं , जिका लीजिये जेम ।।27।।

वेद भाग कर वांटियो , तिण पळ में फळ तेह ।।

राजी हुय इम रांणियां , जीम लियो फळ जेह ।।28।।

ता फळ के परताप ते , सुतन जनमिया चार ।।

धिन्न अजोधा धाम में , बही युं खुशी बहार ।।29।।

निरखत कौशल नन्द को , मन ही मन मुसकात ।।

जोड़ी ओपत जगत में , भलविध चारों भ्रात ।।30।।

मीठा मीर डभाल