करजोड़ करो सब घणी खम्मा
जंग जीतण वीर जवानां नै..💐
------------------------------------
आर्यवृत पे जद आफत,
अणतोली बण मंडराई ही।
तैयार खड़्या सीनों ताण्यां,
लपकत ना देर लगाई ही।
हंसता आया झूझार हूया,
पल पल बांचो परवाणा नै।
करजोड़ करो सब घणी खम्मा,
जंग जीतण वीर जवानां नै।।(1)
टुट पड़े अरिदल टकरातां,
अडीग छाती दे अमर अड़्या।
समरांगण रा सब श्रेष्ठवीर,
खड़ग धार निर्भीक खड़्या।।
निवण करौ हद गर्व करो,
जयघोष करो हिन्द गाणा नै।
करजोड़ करो सब घणी खम्मा,
जंग जीतण वीर जवाणां नै।(2)
मातृ भूमि रा मान रूखाळा,
शीट कट्या पण झूक्या नहीं।
आन सरिखी पाळ आबरू,
मानवता स्यूं मुक्या नहीं।
करो याद कुर्बाणी उण री,
मत भूलो मर्दाना नै।
करजोड़ किज्यो सब घणी खम्मा,
जंग जीतण वीर जवानां नै।।(3)
भई आपदा काळ भयंकर,
जीव जूण जद जद झूझ्यो।
संकट मोचन भयो सहायक,
सर्व सैना रो दळ सुज्यो।।
कमी न राखी कर्म करण में,
खोलत हियै खजाणा नै।
करजोड़ किज्यो सब घणी खम्मा,
जंग जीतण वीर जवानां नै।।(4)
सरहद री सीमा पर सांप्रत
कुळदीपक अपणा खड़या लडे़।
छाती दुश्मन री छैदण नै,
प्रबल अगाड़ी ऊछळ पड़ै।।
लाखिणी लाज लजावै ना
गढ़ गोखां राज घराणा नै।
करजोड़ किज्यो सब घणी खम्मा,
जंग जीतण वीर जवानां नै।।(5)
मात तणे हिवड़े रा मौती,
सगळा कृष्ण कन्हाई हैं।
मरवण रे हाथां री मंहन्दी,
सब बहन सरिखा भाई है।
अपणायत सारु पूरो ओळियां
ठाड धार ठिकाणा नै।
करजोड़ किज्यो सब घणी खम्मा,
जंग जीतण वीर जवानां नै।।(6)
सुणो गौर कर सब सैणा,
करजोड़त ओही कहणो है।
सब सैना रो सम्मान करो,
शोषण इण रो न सहणो है।
यूं बात बारहठ रिछपाल भणे,
सन्मुख सगळा ही स्याणा नै।।
करजोड़ किज्यो सब घणी खम्मा,
जंग जीतण वीर जवानां नै।।(7)
-----------------------------------------------
रिछपाल बारहठ रजवाडी़
।। चारणवासी चूरू ।।
0 टिप्पणियाँ
If you have any dout please let me know and contect at mahendrasingh2015charan@gmail.com